৩০ শে জুন হুল দিবস সে শহীদ দিবস ?

সাঁওতালি ভাষায় এই লেখাটি লিখেছেন – বিশ্বনাথ হেমব্রম (কল্যাণী , নদীয়া।)

হুল মেনেদ লৌড়হৌই । আদ হুল দ চেদাঃ লাকতি কানা। হুল দ চেদ খাতির ? হুল দ তিন অক্ত দরকার কানা । আপনার সানাম কওয়াঃ মনেরে জানিজ নওয়া কাথা ক কুকলি লেকাতে গুরলৌও বাডায় গেয়া|
হুল দ উন অক্ত লাকতি কানা, যাহা অক্তে মিদ জাতি, সাঁওতা, সমাজ আর মিদ জাতি, সাঁওতা সমাজ হাঃ রডচ কচলন নাহাচার হারকেৎ শাসেদ রেনাঃ হামাল ভৌরিয়ৌ আদো বায় গঃ দাড়েয়াঃ কান| হুল দ অনা খাতির, যাহা দ মিদ জাতি সাঁওতা সমাজ নাওয়া কারতে বাঞ্চাও রেনাঃ হর ডাহার-এ উদুঃ আয়া| হুল দ উন অক্ত দরকার যাহা অক্তে মিদ জাতি সাঁওতা সমাজ আদো বাঞ্চাও রেনাঃ ডাহার বায় ঞাম অক্তে, উন অক্ত গে বাঞ্চাও রেনাঃ মুচাদ ডাহার লেকাতে হুল দ সাপড়াও হেজ আকানা যুগ যুগ জায়যুগ খন গে| নাগাম সাকামরে অনা রেনাঃ পারতুল, পরমান আডি আয়মা গে মেনাঃ আ|
অনকাগে আবো ভারত দিশম রেনাঃ নাগাম সাকাম রেহঁ সোনা আখরতে ১৮৫৫ সাল রেনাঃ ৩০শে জুন হুল দ অল মেনাঃ তাবোনা| নওয়া হুল দুকিন সাপড়াও লেদা পৌহিল বিহার পনত রেয়াঃ সাহেবগঞ্জ জিলা (নিতকার দ ঝাড়খণ্ড পনত) ভাগনাডিহি আতু রিন বার বয়হা সিদু মুর্মু আর কানু মুর্মু তাকিন| চেদাঃ চেদ খাতির হুল কিন সাপড়াও লেদা, অনা বন বাডায় লে গে দেলা|
উন দ আবো ভারত দিশম ব্রিটিশ ইংরেজ কওয়া: রাজআরি শাসন হালোৎ রে| ইংরেজ কওয়া জোর জুলুম চালাঃ কানা আবো ভারত দিশম রিন মানমী ক চেতান রে| বিশেষ কায়তে রেঙ্গেজ নাচার সমাজ রিন লাতার গাতাক চেতান রে, আবো সানতাড় হপন দ উন অক্তে ইংরেজ কওয়াঃ চিয়ৌ আকান ঠাঁও মেনেদ দামিন-ই-কোহ ইলাকা রেক আয়বাস এদা| বীর বুরু গাডা মুডু লাটা পাটা ধাসকাও মাঃ পারছা কাতে চাষ আবাদ কাতে জিয়ন ক খান্ডাও এদ তাঁহেন । মেনখান উন অক্ত রিনিজ ব্রিটিশ গভর্নর লর্ড ডালহৌসি হাঃ নাওয়া হাসা জুমি আরি আর জমিদার মহাজন সুদখোর ইংরেজ দালাল কওয়াঃ রডচ কচলন সাঁওতে আবোরিন সান্তাড় তিরলৌ হপন চেতান নাহাচার দালতল আডি গে জাসতি ইদি এনা|
নংকান পরিস্থিতি রে সান্তাড় হপনাঃ জিয়ন বাঞ্চাও দহয়রে আনাট সিরজৌও এনা| নতে খাজনা রেনাঃ গনং আডিগে জাসতি এনা সাঁওতে তিরলৌ হপন চেতান ইংরেজ সাহেব জমিদার মহাজন কওয়াঃ লোভ লালসা রেয়াঃ রিকিড় রামা আডিগে জাসতি এনা|
এনখান আদো বাবন তাহেন থির থার| মনেরে নওয়া রিহিট সাব কাতে চুনু মাঝি (মুর্মু ) রিন হপন সিদু মুর্মু আর কানু মুর্মু তাকিন কিন হহ লেদা সারজম গিরৌ তালাতে হুলসৌই এতহব রেনাঃ দরবার ঝাড়খণ্ড পনত রেয়াঃ ভাগনাডিহি আতুরে কুনৌমী চান্দো তেরদেজ মার্শাল সাক্ষী কাতে| ঠিক তেহেঞ খন ১৬৫ সেরমা লাহারে ৩০ শে জুন হিলঃ|
(On 30th June, a full moon day,10,000 Santals assembled at Bhagnadihi. The Thakur’s order was announced and Kirta, Bhadoo and Sunnoo – all Manjhis wrote a memorandum at Sidhu’s direction, addressed to the Government, with copies to the Commissioner, Collector and the Magistrate of Bhagalpur as well as of Birbhum and to the Darogas of the Dighi and Rajmahal thanas, as also to the Zaminders and others, demanding replies within a fortnight.)
অনা হুলসৌই দরবার রে ১০ হাজার খন ২০ হাজার খেরওয়াল সান্তাড় মাঝি হপন ক সেটের তাহে কাতে গটা লেদা ক –
** আদ ইংরেজ কওয়াঃ রাজ বাংবন বাতাও আ|
** কষ্ট কাতে আরজাও আকান হাসা মাটি বাংবন রেজ হচ আ।
** জাসতি খাজনা বাংবন এমঃ আ।
** আবোয়াঃ দিশম রে আবোগে রাজ বন চালাও আ|
** তিরলৌ হপন চেতান ইংরেজ কওয়াঃ লোভ লালচ নাহাচার বাংবন সাহাও আ।
** তিরলৌ কওয়াঃ মান, ইজ্জত, সরম, ভরম বন বাঞ্চাও দহয় তাকোয়া।
** সাঁওতে আবো চেতান জোর জুলুম নাহাচার রেনাঃ কাথা ক কলকাতারে মেনায় বড়লাট ঠেন তাড়াম তে সেন কাতে বন লাই সদরা|
অনা রপড় গটা আকান কাথা লেকাতে গে সিদু কানু তাকিনাঃ আয়ুরতে তাড়াম ডাহার তে কয়েক শায় মাইল কলকাতা সেনঃ ক রিকৌ লেদা| আর অনা লেকাতে গে কৌমিহরা ক এতহব লেদা| মেনখান তায়মতে নানা হুনৌর আনাট এটকে টঁড়ে সিরজৌও এনতে আকোয়াঃ যাহা কুকমু কলকাতা অভিযান অনা দ বাং সারি লেন তাকোয়া| এনতে রেহঁ নওয়া হুলসৌই জুমেলায় দ ভারত দিশম রেনাঃ পুইলু গনতান্ত্রিক তাড়াম ডাহার জুমেলায় মেনতে লেখা ঞাম আকানা| ইনা তায়নম হুল রেয়াঃ নাগাম যাহা ১৮৫৫ সাল রেনাঃ ৭ই জুলাই খন এতহব লেনা মহেশ দারোগা আর কেনারাম ভগত সাঁও আয়মা সিপাহী ক হেলেচ গজ্ তালাতে মায়া‌ম গাডা ক লিঙ্গি লেদা অনা রেনাঃ কাহিনী দ জানিজ সানাম গে কম বিশি বন বাডায় গেয়া| বাডায় তাহেন মা নওয়া হুল দ মায়াম গাডা লিঙ্গি হচ রেয়াঃ হুল দ বাং তাহে কানা| গনতান্ত্রিক আরি তে তাড়াম কাতে অভাব অভিযোগ দাবি দাওয়া আদায় রেনাঃ লৌড়হৌই তাহে কানা| মেনখান নুকু ব্রিটিশ ইংরেজ কওয়াঃ জাঙ্গা চাটোঃ জমিদার, মহাজন, সুদখোর দালাল কওয়াঃ কারসাজি তে নওয়া হুল দ তায়মতে গপজ্ তাপাম লুটপাট তালাতে মায়াম গাডা লিঙ্গি লেনা|
মা এনখান সানাম ক উইহৌর দিশৌ গুনি ভৌবিত তাবোন পে, ৩০ শে জুন হুল দিবস সে শহীদ দিবস কান তাবোনা| যুদি ৩০ শে জুন হিলঃ নওয়া হুল রিন হুলগৌরিয়ৌ ক বঙ্গাতালা লেনখান দ শহীদ দিবস মেন দ যথাৎ কঃ আ| মেনখান ইনৌ হিলঃ দ সানাম হুলগৌরিয়ৌ ক ভাগনাডিহি আতুরে দুপড়ুব মিদ কাতে রপড় গটা লেদা ক, আদো বাবন তাহেন থির| হুল বন এতহব গেয়া| ইনৌ তায়নম রেয়াঃ নাগাম দ সানাম গেবন বাডায়া| অনাতে হুল এতহব রেয়াঃ কিরিয়ৌ হাতাও লেকাতে ৩০ শে জুন দ হুল মাহা (দিবস ) মেন গে যথাৎ কানা|

তথ্য সূত্র –
১৮৫৫ সাল রেনাঃ হুল বাবদ অল আকান আয়মা পুঁথি পতব ক| যেলেকা-

• সাঁওতাল গণসংগ্রামের ইতিহাস – ধীরেন্দ্রনাথ বাস্কে|
• সাঁওতাল স্বাধীনতা সংগ্রামের ইতিহাস – বুদ্ধেশ্বর টুডু
• সাঁওতাল বিদ্রোহের রোজনামচা – তারাপদ রায়|
• Santal Movement – page 410.
• সাঁওতে আর হঁ আয়মা পুঁথি পতব|

(এই লেখায় লেখকের মতামত ও দায় একান্তই নিজস্ব| এতে pbams.org পোর্টালের কোনো দায় নেই|)

Picture collected from internet.