খালি সানতাড় জাতিয়াঃ সুমুঙ ধরমদ হুয়ুঃকানা “সারি” আর বাকি আদিবাসী কোওয়াঃ ধরমদ হুয়ুঃ কানা “সারনা”।

অনলিয়ৌ :- সিরজন কুমার টুডু ( ঝাড়গ্রাম)

“সারি” “সারনা” ধরম ইদিকাতে সানতাড় হপনাঃ বহঃ রে যাহা বাঘুত এ লাগাও আকান দ উনি বাঘুত দ সানতাড় হপনাঃ বহঃ খনাঃ দ ঝাড়াও ফারচা লাক্তিঃ কানা । আডিদিন খনগে সারি সারনা ধরম ইদিকাতে সানতাড় হপন ক তালারে কৌইজৌ খৌপৌরি লেতাড়গে মেনাঃ আঃ। আধান কক মেমেন কানা সানতাড় হপনাঃ ধরমদ সারি আর আধান কক মেমেন কানা সানতাড় হপনাঃ ধরমদ সারনা। সারিগে ধরম ইদিকাতে আবোঃ সানতাড় হপনক ভারত পাকিস্তান দিশম লেকাবন ভেগার উতৌর আকানা। উড়িষ্যা, বিহার, ঝাড়খণ্ড, আসাম পনতরেন সানতাড় হপন কক মেমেন কানা সানতাড়াঃ ধরমদ সারনা আর খালি বেঙ্গল পনতরেন সানতাড় কক মেমেন কানা সানতাড়াঃ ধরমদ সারি। সানতাড় হপন তালারে ধরম ইদিকাতে নংকা খৌপৌরি সিরজৌও ঞেলতে আডিগান সানতাড়গেক মেমেন কানা আবঃ তালারে খৌপৌরি বাংকাতে বাংখান বানার ধরম ঞুতুম “সারি সারনা” গেবন অল সারিয়া বাংখান বন গটা সারিয়া। মেনখান আডিগান সানতাড় হপনগে জানিচ ধরম ইদিকাতে বুটৌঃ সাহিচ বাংবন বাডায়তে আথৌড়ি কাডা,ডাঙরি লেকাবন রপঃ কানা। অকয়াঃ ধরমদ সারি আর অকয়াঃ ধরমদ সারনা নোওয়ারেয়াঃ তেতেৎতেৎ সে ফেডাৎতেৎ ফারচা ফারচি সাহিচ ইঞ লৌই পুষ্টোও এদা। ইনৌ তায়নম অকয় অকাটাঃ ধরমপে বাতাওআ অনাদ আপান আপিনাঃ বাপ্যার, জবরদস্তি কাতেৎদ মানাও বাতাওদ বৌঞ মেতাঃ আপে কানা। চেদাঃ সে ভারত দিশমরেয়াঃ সংবিধানরে পুষ্টোও সাহিচ অল মেনাঃআ অকয় অকা ধরম এ মানাও বাতাওআ অনাদ আজাঃ ব্যাপার অকয়হ লেবৎকাতে সে পড আরাঃ বেগেৎ কাতে সে ধমকাও কাতেৎ সে দালতল কাতেৎদ অহম বাতাও হচঃ দাড়েঃআয়া। সানাম সানতাড় হপনাঃ বাড়ায় লাক্তি কানা যে সারি আর সারনা ধরমদ যুদৌঃ যুদৌঃ গেয়া। মিৎটাঙ ঠেকারে বেগাড় জাঙ আর মারিচ জাঙ মেশা তাহেন খান অকাটাঃ বেগাড় জাঙ আর অকাটা মারিচ জাঙ ঠৌওকৌঃদ চেৎলেকা মুশকিল গেয়া অনকাগে সারি সারনা ধরমহ আবঃ সানতাড় হপন বেগাড় জাঙ মারিচ জাঙ লেকাগে বাংবন ঠৌওকৌঃ দাড়েয়াঃ কানা। অনকাগে নংকাহ ঞেল কানা ফেডাৎরে আলাগ আলাগ বারয়া রেহেৎরেয়াঃ পহা উলদারে যে মিৎঠেন মেশাঃকাতে ভেগার ভেগার চাঁঙড়া আকানা অনাদ জানিচ আডিগান হড়গে বাংবন দিশৌঃ আকাদা অনাতে মিৎটাঙ উলদারে ঞেলতে আবঃ কোওয়া মনেরে কুকলি গুরলৌঃ গুরলিঃ কানা মিৎটাঙ দারেরেয়াঃ উলবিলি মিৎধারে না দ জজঃ এনা চিকৌতে ? আর মিৎধারে না দ সিবিল এনা চিকৌতে? নোওয়া কুকলিরেয়াঃ তেলা ক গে বৌই বৌই তে আড়গম সমান ইদিয়েৎ তাবন ইঞ। ভারত দিশমরেন সানাম আদিবাসী কোওয়াঃ মুদরে ধরম দ বার হাটিঞতে হাটিঞ আকানা সে গটা আকানা। মিৎ হাটিঞদ খালি সানতাড় জাতিয়াঃ সুমুঙ নিরলৌঃ ধরমদ হুয়ুঃকানা “সারি” আর দসার হাটীঞদ বাকি আদিবাসী কোওয়াঃ কোল,ভিল,হো,মুন্ডা,মুডৌঃ,মাহালে,খাড়য়া,লাড়কা,ওঁরাঙ এমান আদিবাসী কোওয়াঃ ধরমদ হুয়ুঃ কানা “সারনা”।সোঝে সোঝেতে বুঝৌও লাগিৎতে যদিঞ মেন আ ঝতঃ হাকুগে হাকুবন মেতাঃআ কওয়া মেনখান হাকুক মুদরেহত ভেড়ার ভেগার ঞুতুম মেনাঃ তাকওয়া। মনে কাঃপে মিৎধারেরেদ রুই হাকু দহঃ মেনাঃ কোওয়া আর মিৎধারেরেদ খুচরৌঃ হাকু দহঃ মেনাঃ কওয়া। রুই হাকু সাওদ এ্যটাঃ খুচরৌঃ হাকু মেশাঃ বানুঃ কওয়া অনাতে নুকু হাকুদ নিরলৌঃ রুই হাকুবন মেতাঃ আক কানা অনকাগে খুচরৌঃ হাকুরেদ ইচৌঃ ডৌড়কৌঃ, পুঁটি,লেজরা এমান হাকুক মেশা মেনাঃ কওয়া অনাতে নুকু হাকুদ খুচরৌ হাকু বন মেতাঃ আক কানা সে নিরলৌঃ হাকু দ বাংবন মেতাঃ আক কানা। অনাতে নিরলৌঃ রুই হাকুলেকাগে সানতাড় হপনাঃ ধরমদ হুয়ুঃকানা “সারি” আর খুচরৌঃ হাকু মেশামিশি কাতে এ্যটাঃ আদিবাসী কোওয়াঃ ধরমদ হুয়ুঃকানা “সারনা”। অনাতে বেঙ্গল পনৎ সরকার “সারি” ধরমদ সানতাড় জাতিয়াঃ ধরম কানা মেনতে বাতাও সারি আকাদায় অনারেয়াঃ গেজেট নাম্বার দ হুয়ুঃ কানা West Bengal Backward Classes Welfare Department Memo.no- 942CRI/1-3CRI2000 Date:- 21/10/2000 সাওতে ভারত সরকার আ খাতারেহ সারি আর সারনা ধরমরেয়াঃ কাথাদ রেকর্ড মেনাঃআ। Indian Census Board(ICB) সেনসাস কাতে ঞেল আকাদায় সে ঠৌওকৌঃ সাহিচ এ লৌই বুটৌঃ আকাদায় আদিবাসী য়াঃদ বারয়া ধরম । খালি সানতাড় সুমুঙআ ধরমদ হুয়ুঃকানা “সারি”ধরম আর বাকি কোল,ভিল,হো,মুন্ডা,মুডৌ,মাহালে,খাড়য়া,লাড়কা,ওঁরাঙ এমান আদিবাসী কোওয়াঃ ধরমদ হুয়ুঃ কানা “সারনা”। অনারেয়াঃ গেজেট মেমো নাম্বার দ হুয়ুঃ কানা Central ICB Notice no- TAB.11015(R)/1991/6074/(30.10.2002) । তাহলে সারি সারনা ধরমদ অকয় অকয় কোওয়াঃ কানা ICB পুষ্টৌও সাহিচ এ অল সদর আকাদায়। তাহলে খানমা ধরম ইদিকাতে রাপাচাঃ,কৌইজৌঃ, খৌপৌরিরেয়াঃ কাথাগে বানুঃআ। আসলে নওয়া কাথাকগে আডিহড় আ বাড়ায় বানুঃতে অথৌড়ি গেবন রপঃ কানা। এনহ আডিগান সানতাড় বয়হাক কুকলিক দহয় আ তাহলে সানতাড়দ আদিবাসী বাং কানাবন সে আদিবাসী গাতাকরেদ বাংবন পাড়াঃ কানা?
নওয়ারেয়াঃ তেলাদ হুয়ুঃকানা সানতাড়হ আদিবাসী কানাক আর এ্যটাঃ আদিবাসী হ আদিবাসী কানাক মেনখান আবঃ সানতাড়াঃ আরিচালি,বঙ্গাবুরু,বাপলা,ভান্ডান,তেলহান,হয়ঃরুয়ৌড়,ছৌটৌয়ৌর,কারাম এমানক এ্যটাঃ আদিবাসী সাও কি মিৎগেয়া? নিহৌত বাং মিদুঃআ, তাহলে বাং মিদুঃখান সানতাড় হপনাঃ ধরমদ সারিগে কানা সারনাদ তিসহ বাং হুয় দাড়েয়াঃআ। নংকাগে আরহ আডিগান সানতাড় বয়হাক মেমেন কানা যে গুরু গোমকে য়াঃ অলচিকি যদি পে বাতাওআ তবেখান গুরু গোমকে য়াঃ সারনা ধরমদ চেদাঃ বাংপে বাতাও আ? নওয়ামাত আডি হাহাড়া কাথা কানা? নওয়া কুকলিরেয়াঃ তেলা লেকাতে পৌইলৌরেগিঞ মেন আ গুরু গোমকে দ অলগুরু কানায় ধরম গুরুদ বাং। অলগুরুদ চেদাঃ ধরমগুরু মেনতে খালি খালিতে ঞলহাৎপে লাঠাঃ আয় কানা? যাহায় বয়হাক নংকান কাথাক কুকলিক দহঃয়েৎদ নুকুয়াঃহ ভুলদ বানুঃআ আর যাহায় বয়হাক লৌই এদা সানতাড়াঃগে সারনা ধরম কানা নুকুয়াঃহ ভুলদ বানুঃআ, চেদাঃ সে যাহায় যাহায় সানতাড় বয়হাক গুরুগোমকে য়াঃ হিতৌল বই ইদিকাতে বেবাড়িচ ক কামিয়েৎদ উনকু কওয়াঃগে আড়ি মারাং ভুল কানা। গুরুগোমকেয়াঃ পৌইলৌঃ যাহা হিতৌল বই ছাপাকাতে উছৌন লেনদ অনা পৌইলৌঃ উছৌনরেদ সারনা ধরমরেয়াঃ কাথাদ বাং অল তাহে কানা সে গুরুগোমকে দ অকা ধরমরেয়াঃ কাথাহ বায় মেন আকাদা ? মেনখান নাহাঃ সারনা ধরম প্রচারিয়ৌক অনা হিতৌল বইরে সারনা ধরম কাথা অল মেশাঃকাতেৎক ছাপা সদর আকাদা সে ক উছৌন আকাদা।
অনাতে নাহাঃ সারনা ধরম প্রচারিয়ৌক সারনা ধরম সানতাড় হপনঠেন জাসতিকারতে প্রচারঃমা অনা লাগিৎতে গুরুগোমকে ক সামাঙ আকাদেয়া ক সে হৌতৌয়ৌর মেনতে ক ব্যবহার এ কানা। নওয়া খাতিরতে আডিগান সানতাড় বয়হা কওয়া বহঃ ক বাড়িচ আকাৎ তাকওয়া সে সানতাড় হপন ক ঠেন ভুল ম্যাসেজ চালাঃ কানা।নংকা ধরমরেয়াঃ ভুল প্রচার কাতে যাহায় যাহায় বয়হাক গুরুগোমকে ঞলহাৎ পে লাঠাঃআয় কানদ আর অলগুরুগে ধরমগুরু মেনতে দিশম হড়ঠেন পে প্রচারে কানদ উনকু কদ হানা পুরীখন গুরুগোমকেহ তিসহ ইকৌঃদ বায় এমাঃ পেয়া আর হাপেন দিন লাগিৎ নুকু ধরম প্রচারিয়ৌকহ দিড়মিলেকা পাপপে হৌর সামটাও জঙকানা। অনকাগে আরহ আডিগান বয়হাক মেমেনকানা গটা উড়িষ্যা, ঝাড়খন্ড,আসামরেন সানতাড়ক সারনা চাবাঃয়েনা আর বেঙ্গল রেন বার পে গান্ডাগান সানতাড়গে খালি সারি ধরম লাগিৎপে ফটর ফটরঃ কানাপে সাওতে আরহক মেমেন কানা যে ভারত দিশমরে সারনা ধরম হড়গেক জাসতিয়া অনাতে সরকার দ সারনা ধরমরেয়াঃগে ধরম কোড দয় এমঃ আয় আর আপে বেঙ্গলরেন বার পে গান্ডাগান হড় লাগিৎ সারি ধরমরেয়াঃ কোডদ সরকার তিসহ বায় এমাঃ পেয়া? নওয়া রেয়াঃ তেলা লেকাতে আপেঠেন সলহে কাথাতিঞ লৌইআ, মনে কাঃ পে মিৎটাঙ হাড়ামরেন বারয়া হপন তায়, এনখান মাড়াঙ হপনরেন গিদরৌদ তায় মিৎটাঙ আর হুডিঞ হপনরেন গিদরৌদ তায় মড়ে গটাঙ। তাহলে যাহাতিস যদি উনি হাড়াম আ অতহাসা ক ভাগ আ এনখান উনকিন মারাঙ হপন আর হুডিঞ হপন তালারে উনি হাড়ামাঃ হাসা সমানতে বারঠেন হাটিঞঃআ সে হুডিঞ হপনরেন মড়ে গটাঙ গিদরৌঃ ঞেলতে হুডিঞ হপনদ জাসতি হাসা হাটিঞরেয় ঞামায়? নিহৌত নওয়াদ বাং হোয় দাড়েয়াঃআ? অনকাগে অকা ধরম পাহাটা হড় লেখাজখাতেক সাঙ্গেয়া অনা লেকাতে সরকার ধরমদ সারি সারনাদ বায় গটা আকাদা। মানাও বাতাও লেকাতে সরকার ধরমদয় গটা আকাদায়, অকা পাহাটা ক জাসতিয়া আর অকা পাহাটাক কম আ অনা লেকাতেদ সরকার ধরমদ বায় গটা আকাদা। অনাতে যাহায় ক পে লৌই আ সারনা ধরমগে কোড এ ঞামায় আর সারি ধরমদ কোড বায় ঞামা, অনারে ইঞিঞ লৌই আ যদি সারনা ধরম কোড এ ঞামায় তবে সারি ধরম কোডহ 100% এ ঞামায় নওয়াদ অকয়হ বাংক আটকাও দাড়েয়াঃআ। যাহারে এ্যটাঃ আদিবাসী ক সারনা ধরম কোড ঞাম লাগিৎ তিনৌঃ বাংক গারজাঃকানা অনাখন জাসতিকারতে সানতাড় কঃ গে কঃ গারজাঃ কানা। যাহায় সানতাড়ক সারনা ধরম কোড ঞাম লাগিৎতেপে গারজাঃ কানদ, যদি যাহাতিস সারনা ধরম কোড এ ঞামায় অনাদ চেৎ ঞুমুততে কোড এ ঞামায় বাড়ায়াপে? অনাদ আদিবাসী আ ধরম কোড লেকাতে ঞামায়, সানতাড়া লেকাতেদ বাং। তাহলে সারনা ধরমগে সানতাড়াঃ ধরম কানা মেনতে তিসহ বাংবন লৌই দাড়েয়াঃআ। তাহলে যাহাটাঃ আবঃ সানতাড়াঃ ধরম বাংকানা অনা ইদিকাতে আবঃ সানতাড় জাতিদ বেকার বেকারতে চেদাঃ বহঃবন ঘামাও আ ? তেহেঞ আবঃইচ মানতান সালখান মুরমু গোমকেহ আজাঃ রাজনীতি স্বার্থ লাগিৎতে সানাম আদিবাসী কওয়াঃ মনে ঞাম লাগিৎতে আদিবাসী কওয়াঃ সারনা ধরম গেয় সাপোর্ট এদা। নডেদ মুরমু গোমকেহ আদিবাসী ধরম কোড ঞাম লাগিৎতেয় ডিমান্ড আকাদা সানতাড়াঃ ধরম কোড ঞাম লেকাতেদ বায় ডিমান্ড আকাদা। যাহায় মুরমু গোমকে সানতাড় ভাষা অষ্টম তফসিল রে সেলেদ লাগিৎতে সায় সায় সারহাও ইঞ চাল আয় কানা আর 100 রে 100 নাম্বার ইঞ এমায় কানা মেনখান তেহেঞ উনি মুরমু গোমকে গে ধরম ইদিকাতে লৌড়হৌইরে 100 নাম্বার বদলতে (-100) নাম্বার ইঞ এমায় কানা চেদাঃ সে মুরমু গোমকে দ আদিবাসী আ ধরম ইদিকাতে এ লৌড়হৌই কানা সানতাড়াঃ ধরম ইদিকাতেৎ দ বাঙা? অনাতে ইঞাঃ মেনদ ভারত সরকার আ ইনবর রে যেখন বানার ধরম ঞুতুমগে খোদা কাতেৎ মেনাঃআ তাহলে খান সরকার যদি সারনা ধরম কোড এ এমায় তাহলে সারি ধরম কোডহ এমঃতে বাধ্য তাহেনায়। অকয়াঃ ধরম সারি আর অকয়াঃ ধরম সারনা কানা অনারেয়াঃ হুডিঞ মাছা কাহানি দিশম হড় তালারিঞ লৌই সদর কেঃআ। মা এনখান সানাম ক গে জহার।।